Cé Orquestra Pantasma
Home Orquestra
Fíos do querer
Espectáculo para meniños e meniñas de 0 a 5 anos.
Acompañados dos seus pais, gozarán de cantigas de primeiras palabras, para abanear, para dar bicos, abrazos, facer palmiñas, o cabaliño…
Espectáculo dividido en dúas partes: unha primeira de música para xogar, cantar e bailar e unha segunda de exploración instrumental con axóuxeres e obxectos sonoros feitos a partir de materiais naturais.
A Voar
Espectáculo infantil para maiores de 3 anos.
Baseado no libro-disco A Voar, e ao son do enerxético ritmo de Cé orquestra pantasma, cóntase e cántase a viaxe da pequena Xoana, xoaniña que movida pola curiosidade e o desexo de voar, emprenderá unha longa viaxe que a súa vida mudará.
Espectáculo divertido e dinámico, dálle ao público a posibilidade de recuperar o protagonismo activo sobre a súa diversión.
A Voar pretende axudar aos nenos e nenas a reivindicar a confianza necesaria para satisfacer as súas necesidades de liberdade, movemento e xogo libre, así pois, nenos e nenas…a voar!!
O Xogueteiro
Desta volta Cé Orquestra Pantasma da un paso máis aló na súa personaxe, meténdose na pel dun feirante xogueteiro, que entre rimas, música e baile iranos engaiolando cara un mundo marabilloso: o mundo dos xogos e xoguetes Miudiños.
Conservando a alta participación que caracteriza os seus espectáculos, no Xogueteiro combínase un primeiro momento de música e baile seguido dun xenial espazo de xogo con brinquedos tradicionais. Pequenos e maiores compartirán momentos máxicos, bailando, xogando…disfrutando.
Brincadeiras Miudiñas
Creación, xogos e música para todas as idades.
As Brincadeiras Miudiñas son pura diversión: un espazo e un tempo para gozar cantando, bailando, xogando e creando con Cé orquestra pantasma.
Neste espectáculo o home orquestra comparte todo o seu ser: música, obradoiro de creación libre con materiais naturais, xogos e xoguetes tradicionais e da natureza serven de base para lembrar vellas formas de brincar, indispensables para esta vida moderna, querendo recuperar a rúa e o aire libre como espazos principais para o xogo e felicidade das persoas.
Cé Orquestra Pantasma en feiras, festivais e romerías.
A Orquestra Pantasma consigue transportarnos aos tempos en que nas nosas festas mais arraigadas todos eran partícipes e creadores do divertimento, quedando a pasividade practicamente desterrada do campo da festa: home orquestra e público fúndense nun so bloque logrando un clima único en cada ocasión.
