Por que redactar un proxecto de patio?
Moitas veces as comunidades educativas comezan a intervir aos poucos no patio da escola. Isto é algo marabilloso, pero pode derivar en propostas aleatorias, pouco pensadas. Isto pode derivar en que un tempo despois nos arrepintamos, porque nos damos conta que ía mellor outra proposta diferente. Como arranxamos isto? Animándonos a redactar un proxecto de patio.
O proxecto pode ser mais ou menos ambicioso. Mais ou menos grande. Pero sí que recolla as necesidades e desexos do alumnado, profesorado, persoal non docente e familias. Deste xeito podemos propoñer un proxecto único e exclusivo para ese espazo.
Cales son os beneficios?
Cales son algúns beneficios de invertir tempo na redacción dun proxecto? Ter un proxecto permítenos:
Planificar a intervención
O feito de analizar o espazo ao completo danos pé a estruturar ben as solucións propostas. Saber que necesidades temos, como é o noso lugar, que espazos de xogo precisamos, onde incorporar a vexetación. Pensando, iso sí, nun medio prazo: ter na cabeza entre 2 e 3 cursos escolares para ver resultados!
Optimizar os recursos
Cando sabemos o que precisamos aproveitamos moito mellor os agasallos que a vida nos ofrece. Podemos poñer en valor materiais e propostas que doutro xeito poden pasar desapercibidos. Estarmos atentas aos recursos que poden ser útiles pode aforrarnos cartos e esforzos!
Conseguir financiamento
O acceso a programas, premios, subvencións, administración…é moito máis doado cando temos un documento xa pensado e elaborado que presentar. Moito máis se vai redactado por unha comunidade educativa ao completo (non só por unha das súas “patas”)
A transmisión da intervención na comunidade educativa
Ao seren as comunidades educativas comunidades vivas, nas que persoas que a integran cambian con frecuencia é bo ter documentos que sirvan como referencia e meta para toda a comunidade. Coñecendo isto, é moito mellor ten un proxecto aprobado en consello escolar e incorporado ao proxecto educativo de centro. Este feito facilita a comprensión das novas persoas da comunidade. Cada quen pode valorar que aportar e como actuar.
Merece a pena?
Dende Miudiño animámosvos sen dubidar á redacción de proxecto de patio. Porque sabemos que sí, sí merece a pena. Porque o esforzo, por pequeno que sexa, vai ter resultados. Porque vemos que a intervención en patio é unha escusa fermosa para cohesionar ás comunidades educativas. Porque nenos e nenas van gozar dun espazo mellor no que desenvolverense e medrar. Moito ánimo!
Nunca dubides de que un pequeno grupo de persoas comprometidas poida cambiar o mundo. De feito, é a única cousa que o logrou. MARGARET MEAD
